Target ti Pilipinas a mangpataud iti 1,200 a megawatt a kuryente manipud iti nuclear energy inton 2032 tapno mapabileg ti seguridad ti suplay ti enerhia iti pagilian, segun kenni Energy Secretary Sharon Garin.
Impakaammo ni Garin daytoy idi Martes iti pannakailukat ti World Nuclear Supply Chain and Philippine International Nuclear Energy Forum 2026.
Sumaruno ti target a 2,400 a megawatt inton 2035 ken 4,800 a megawatt inton 2050.
Karaman kadagiti ad-adalen nga opsion ti panangpaandar manen iti Bataan Nuclear Power Plant, panangbangon iti baro a planta, ken panangusar kadagiti small modular reactors wenno SMRs.
Nupay kasta, nakadepender ti target iti kaadda ti teknolohia agsipudta mabalin nga agbayag iti 10 a tawen ti pannakaibangon ti gagangay a nuclear power plant.
Segun iti Department of Energy, ti tarigagay ti nuclear energy ket paaduen ti suplay ti kuryente ken manggundaway kadagiti renewable energy sources, saan a tapno sukatan dagita.
Agtultuloy met ti pannakaisagana dagiti pagannurotan iti presio ti kuryente ken pannakasigurado a dagiti planta ket agtungpal kadagiti internasional a pagalagadan iti kinatalged.
