Mamati ti Department of Energy (DOE) a dakkel a bentahe para iti Pilipinas ti panangisayangkat iti feasibility studies iti Bataan Nuclear Power Plant (BNPP).
Maipalagip a ti DOE ken ti Korea Hydro and Nuclear Power Company Limited (KHNP) ket nagpirma iti katulagan a ti Korean firm ti mangidaulo iti panagadal ti agpada a teknikal ken ekonomiko nga aspeto.
Amin a gastos ditoy ket awit ti Korea Hydro and Nuclear Power Company Limited.
Iti maysa a palawag, impaganetget ni Energy Secretary Raphael Lotilla a ti kastoy a panagadal ket sigurado a mangpapigsa iti seguridad ti enerhia ti Pilipinas, kas maibasar paylaeng iti linaon ti Philippine Energy Plan (PEP).
Segun kenni Lotilla, maipatungpal ti feasibility iti dua a tukad: umuna ket ti assessment ti agdama a kasasaad ti Bataan Nuclear Power Plant, ken ti maikadua ket ti evaluation no rumbeng a mapabiag ken maisubli manen ti planta.
No mapasamak a saan a mapabiag manen ti planta, kinuna ni Lotilla a mabalin nga irekomendar ti Korean firm dagiti alternatibo a pagpilian, agraman ti panangibangon iti gagangay a planta wenno panangibangon iti bassit a modular reactor.
Ti Korea Hydro and Nuclear Power Company Limited ti operator ti Koria Nuclear Power Site idiay Busan, kapada metlaeng a pasilidad iti planta idiay Bataan.
Babaen ti Philippine Energy Plan, panggep ti Pilipinas ti mangbangon iti umuna a planta ti koriente idi 2023 nga addaan iti kapasidad a 1,200 megawatts ken mapaadu ti kapasidadna iti 2,400MW inton tawen 2035.
Agingga inton tawen 2050 ket nakaplano a maipangato manen daytoy iti 4,800 Megawatts.
