Dagiti mannalon ditoy siyudad ti San Fernando, agpanpanawagan a maipaayanda ti solar-powered water pump
Mula a pagay dagiti mannalon ditoy siyudad ti San Fernando, saanen a mapagnumaran gaputi nakaru a kinakurang ti danum.
Marigatanen dagiti mannalon ditoy siyudad ti San Fernando, La Union gaputi epekto iti napaut nga El Niño, a mangigub-gubway ti nakaru a kinabara ti panawen ken kinakurang ti danum, a mangituntunda iti pannakadadael dagiti mula, panagbaba iti apit, ken agpeggad pay ti biag gapo iti nangato ti temperatura iti kataltalunan.
Segun iti maysa a mannalon ditoy siyudad a ni Manolito Valdomir, natumban dagiti pagay da ken kaadwan ket saanen a nabagasan gapo iti kinakurang ti padanum.
Gaputi dayta, mapilitan da a mannalon a saan pay laeng nga ituloy ti plano da a panagmula ti mais.
Kinuna na pay a nabiit a natyanan ti bubon iti barangay da, nga ad-adda pay a nangpakaro ti problema da a pagsibog iti mula.
Mainaig ti daytoy, kidkiddawen ita dagiti mannalon, babaen kenni Valdomir iti gobierno a maipaayan da ti solar-powered water pump, agsipudta daytoy ti pattien da a dakkel a makatulong tapno makaparnuay da ti danum a pagpasayak iti mula da.
Mamati ni Valdomir a daytoy ti longterm solution iti problema da, pangnamnaan ken nasalimetmet a wagas a pagpadanum, agsipudta patarayen daytoy ti solar panel, imbes a mangnamnama iti kuryente wenno krudo.
Laksid dagitoy a karit iti panagtalon, inallokoy ken pinapigsa ni Valdomir ti pakinakem dagiti pada na a mannalon ken kinuna a pagtalinaeden ti anus kadagiti kastoy a gundaway.
