Nangrugin a marikna idiay Cagayan ken sumagmamano a kabangibang a lugar iti napigsa nga angin ken panangngato ti alon nga ingubuay ti Super Typhoon Rosal.
Segun keni Ensign Dionisio Mahilim Jr., Public Information Officer ti Coast Guard District Northeastern Luzon, karaman kadagiti coastal area a makapadpadas iti nasao a kondisyon iti Dinapigue idiay Isabela, Santa Ana idiay Cagayan, ken probinsia ti Aurora.
Laksid ti panagbalbaliw ti paniempo, agtaltalinaed iti nainget a panangipatungpal ti no-sail policy tapnu maliklikan iti aniaman nga aksidente iti kabaybayan.
Iti agdama, awan pay iti nailista a nadadael a bangka, na-stranded a pasahero, wenno mangngalap a naglabsing kadagiti pagannurutan.
Agtultuloy met iti panagbantay ti Philippine Coast Guard (PCG), kabinnulig dagiti lokal a gobierno ken dadduma pay nga ahensya, bayat a nakabantay met iti posible a panagpigsa pay ti angin ken alon, aglalo iti oras ti high tide.
Nagpalagip manen iti PCG kadagiti mangngalap ken biyahero a saan pay nga apan iti baybay agingga awan pay iti opisyal a waragawag a mabalinen iti agkalap.
