Naisayangkat iti nagduduma nga aktibidad idi kalman Oktubre 31,2026 kas paset iti selebrasyon ti La Union Surfing Break 2026 – Bacnotan Leg.
Kabilang iti surfboard painting competition, sandcastle-making competition, ken beach volleyball tournament a pinasetan dagiti lokal nga artista, atleta, residente, ken turista.
Iti surfboard painting competition, inaramat dagiti nakipaset dagiti surfboard kas canvass tapno ipakitada babaen iti arte ti kultura ken tawid ti ili, biag iti baybay, ken pannakasalaknib ti aglawlaw.
Kabayatanna, impakita met dagiti nakipaset iti sandcastle-making competition ti kinakreatiboda babaen iti panagaramid ti eskultura babaen laeng iti darat iti igid ti baybay.
Nangipaay met iti sabali a gundaway ti beach volleyball tournament kadagiti lokal nga atleta ken beachgoers tapno ipakita ti kabaelanda iti daytoy nga sports.
Naisayangkat dagiti nasao nga aktibidad babaen iti panangidaulo ti lokal a gobierno ti Bacnotan, kabinnulig ti Gobierno Probinsial ti La Union, tapno mapapigsa pay ti pannakaiparangarang ti kultura, talento, sports, ken kinabaknang iti baybay ti ili.
Tarigagay iti tinawen a La Union Surfing Break tapno ital-o ken padur-asen ti turismo ditoy probinsiya babaen iti surfing ken panangiyam-ammo iti kultura, ken naduma-duma a produkto a pang-turismo ditoy La Union.
