Inwaragawag ni sigud nga Ilocos Sur Governor Chavit Singson nga adda iggem na nga ebidensya seknan iti maipagarop nga nalawa nga anomalya, ghost projects, ken substandard a flood control projects, saan laeng ngan idiay Ilocos Sur ngem uray idiay Ilocos Norte.
Segun kenni Singson, 10 laeng kadagiti 551 a flood control projects nga umabot ti bilyones a pondo idiay Ilocos Sur iti nasayaat bayat a dagiti dadduma ket bin-ig a substandard ken ghost project.
Innayonna pay a saan daytoy a mailibak agsipudta agpar-parang iti geotagging a nabayadanen dagitoy ita a tawen, nga uray adda nakita nga iregularidad.
Iti maysa a press conference, kinarit na nga imbestigaran dagiti maipagarop nga anomalya iti proyekto idiay Ilocos Norte ken nangipakita kadagiti dokumento, ladawan, ken video dagiti saan nga agsilpo wenno depektibo a flood control structures.
Kagiddan daytoy, kinuwestiyon ti sigud a gobernador iti pakabuklan nga umabot iti uppat a bilyon a pisos a pondo para iti intero a probinsiya ti Ilocos Norte ken dinillaw na iti Office of the Ombudsman gaputi maipagarop a saan a patas a panagiggem dagiti kaso.
Segun kenni Singson, nu matagi-awan dagiti dokumento na, nakasagana nga umasideg iti simbaan wenno dadduma pay a grupo tapno iwaragawag ti isyu.
Nagpanawagan pay kenni sigud nga House Speaker Martin Romualdez a agsarita seknan iti isyu ken saan nga agulimek iti tengnga dagiti maibatbato a kontrobersya.
