Impaganetget ti House prosecution a saan nga umdas ti testimonia ti testigo ti depensa ni Bise Presidente Sara Duterte a mangsupring iti naduktalan ti forensic accounting expert a ni Alexander Cabrera mainaig iti mapapati a P817.87 million nga saan a mailawlawag a kinabaknang wennu unexplained wealth.
Segun kenni Deputy Speaker Francisco Paolo Ortega V, maysa nga eksperto ni Cabrera iti forensic accounting ken nagusar kadagiti espesial a pamay-an ken panaganalisar iti panagbukelna kadagiti findings.
Kabayatanna, kinuwestion met ni House prosecution spokesperson ken Lanao del Sur Rep. Zia Alonto Adiong ti nakaibasaran ni Suzette Balucanag-Punay iti panagkedked iti panaganalisar ni Cabrera.
Iti impeachment trial, kinuna ni Punay a mapattapatta nga adda 20-porsiento nga interes ni Duterte iti GenCorp, ngem pinasingkedanna a nakaawat ti bise presidente iti P2.14 million manipud iti kompania manipud tawen 2022 agingga 2025 kas return on investment iti maysa a Jollibee branch sadiay Davao City.
Nupay kasta, inadmitir na a saanna a mailasin ti orihinal a gatad ti investment ni Duterte ken awan ti maipakitana a naisurat a dokumento a mangilawlawag iti nasao a transaksion.
Immunan nga insilpo ni Cabrera ni Duterte iti P212.63 milion a mapapati nga saan a naideklara a kita manipud iti GenCorp, a paset ti dagup a P817.87 milion a mapapati a saan a naideklara nga asset ken unexplained wealth.
Agtultuloy ti panangkuestion ti depensa kadagiti natakuatan a findings iti trial iti nabatbati nga Article II impeachment charge kontra kenni Duterte.
