Posible a maartapan ti Commission on Elections (COMELEC) iti target na a tallo a milyon a baro a rehistrado a botante para iti 2028 National and Local Elections, kasaruno ti nangato a bilang dagiti nagparehistro iti umuna a dua nga aldaw ti voters registration.
Segun kenni COMELEC Chairman George Erwin Garcia, aganay 80,000 iti nailista nga aplikasyon iti intero a pagilian, sipud narugyan ti rehistrasyon idi Nobyembre 10.
Mas nangatngato daytoy nu ikumpara iti napalabas a registration period idi Agosto 2025, nga aganay 20,000 laeng ti nailista a nagparehistro iti umuna a dua nga aldaw.
Naragsakan ni Garcia iti panagrehistro dagiti agtutubo nga edad 17 ken 18, agsipudta mangipakpakita daytoy iti interes ti baro nga henerasyon iti sumaruno nga eleksiyon.
Agpaut ti registration agingga Hulyo 30, 2027, ken target ti COMELEC a manayunan iti tallo a milyon dagiti botante tapno madanon ti 74 milyon a pakabuklan a registered voters para iti 2028 elections.
