Nainget a kinondena ti Korte Suprema iti pannakapapatay ni Presiding Judge Joseph M. Wee Sit ti Branch 2, Regional Trial Court idiay Isabela City, Basilan kalpasan a napaltugan idiay Tumaga-Putik Road, Barangay Tumaga, Zamboanga City ita nga aldaw, Nobyembre 12, 2026.
Iti maysa nga opisyal a waragawag, nangidanon ti simpatiya ti Kangatuan a Pagukuman iti pamilya ken katrabahuan ti napapatay a mahistrado.
Binilin metten ni Chief Justice Rodil V. Zalameda iti Office of the Court Administrator, babaen ti Regional Court Manager ken Executive Judge, a personal a makikoordinar iti pamilya ni Judge Wee Sit tapno siguradwen ti dagus a pannakaipaay ti tulong-pinansyal ken dadduma pay a suporta manipud Hudikatura.
Nainget ita ti pannakitinnulong ti Korte Suprema kadagiti otoridad babaen ti Office of the Judiciary Marshals tapno imbestigaran iti krimen ken mabigbig dagiti suspek, nupay saan a mabalin nga isapubliko iti detalye ti imbestigasyon para iti seguridad ti kaso.
Ni Judge Wee Sit, a naipasngay idi Nobyembre 21, 1987 idiay Zamboanga City ket nagturpos ti abogasya idiay Western Mindanao State University, naan-anay a nagbalin nga abogado idi 2015, nagserbi kas prosecutor ken public attorney sakbay a nadutukan iti Hudikatura idi Setyembre 23, 2025.
Impaganetget ti Korte Suprema nga anyaman a panagatake kontra kadagiti ukom ket saan laeng a pangta iti personal a kinatalged dagitoy ngem uray pay iti nawaya, patas, ken independyente a panangipaay ti hustisya ditoy pagilian.
