Nangipaulog ti Makati City Regional Trial Court (RTC) Branch 145 ti extradition warrants of arrest ken hold departure orders (HDO) kontra kada Pastor Apollo Quiboloy, Teresita Dandan, ken Helen Panilag idi Nobiembre 12, 2023, kasaruno ti nadagsen a pammabasol manipud iti Estados Unidos a pakairamanan ti conspiracy to engage in sex trafficking by force, fraud, and coercion, sex trafficking of children, conspiracy to commit sex trafficking, ken bulk cash smuggling.
Nagtaud dagitoy a pammabasol iti indictment a nairuar idi Nobiembre tawen 2021 iti US District Court for the Central District of California, a nangtignay iti Federal Bureau of Investigation (FBI) a mangipaulog iti “wanted” poster para kenni Quiboloy idi Enero 2022.
Iti laksid dagitoy a kaso, agtultuloy a pinaglibakan ni Quiboloy dagiti alegasion ken impaganetget a saan daytoy a sumurot iti hurisdiksion ti Estados Unidos, dinakamat napay dagiti pakaseknan maipapan iti kinatalgedna ken ti kalinteganna iti maiparbeng a proseso, ken kinunana a biktima laeng isuna ti pampolitika a pannakaidadanes.
Malaksid iti kaso nga extradition, sumangsango pay ni Quiboloy kadagiti agsina a kaso ditoy Pilipinas, pakairamanan ti qualified human trafficking ken child abuse, nga inpila ti Department of Justice (DOJ) idi Marso 2024, a nagresulta iti pannakaipaulog ti arrest warrant manipud kadagiti korte iti Davao ken Pasig.
Maibasar iti nagbalin a desision ti korte idiay Makati, nakakita daytoy iti probable cause a dagiti tallo ket dagiti indibidual a nainaganan kadagiti arrest warrant ken indictment idiay Estados Unidos, ken dagiti kaso a maibusor kadakuada ket saklaw iti extradition.
Pinasingkedan ti Department of Justice (DOJ) ti pannakaipaulog dagiti warrant ken HDO, kasaruno iti pormal a panangipila ti Estados Unidos iti petision para iti extradition dagiti tallo idi Nobiembre 9, 2023.
Ti pannakaipaulog ti extradition warrant ken hold departure order ket napateg nga addang iti proseso ti extradition, a mangipasimudaag nga addaan ti korte iti umdas a pangibasaran tapno maituloy ti extradition hearing.
Nakasagana met ti National Bureau of Investigation (NBI) a mangipaay iti maitutop a tulong no bilang maiyeg idiay Estados Unidos ni Quiboloy.
Segun kenni NBI Director Melvin Matibag agpannurayda laeng iti aniaman a pammilin manipud iti Department of Justice.
