Saan a bumaba iti 24 a tattao ti natay ken 11 ti nadundunor kalpasan ti panagdinnungpar ti maysa a bus ken trak idiay Assam, amianan a daya a paset ti India.
Napasamak ti aksidente iti asideg ti Kaziranga National Park, maysa a UNESCO World Heritage Site. mapapati a karaman kadagiti natay ti sumagmamano nga estudiante iti kolehio.
Naitaray met dagiti nadundunor iti Jorhat Medical College and Hospital para iti dagus a pannaka-agas.
Maibasar iti preliminary nga imbestigasyon, posible a maysa kadagiti lugan ti napardas sakbay ti insidente. Nupay kasta, madama pay laeng ti imbestigasyon ti pudno a rason ti aksidente.
Nangipadanon met ti pannakiladingit ni Assam Chief Minister Himanta Biswa Sarma kadagiti pamilya dagiti nairaman ken impasigurdo a prioridad ti gobierno ti panangipaay ti kasapulan a medikal a tulong kadagiti biktima.
Kabayatanna, agtultuloy met a dakkel a parikut dagiti aksidente iti kalsada idiay India, nu sadino a dumanonen iti 183,382 ti natay a nairekord idi tawen 2025.
