BR LA UNION – Umaboten iti 160 a tattao ti kumpirmado a natay ken ginasut dagiti mapukpukaw kalpasan a dinuprak ti dakkel a panaglayos kadagiti lugar iti nagbeddengan ti Nepal ken Tibet.
Segun iti Ministry of Tourism ti Nepal, nasurok-kumurang nga 403 a turista, a pakairamanan ti 341 a gangannaet manipud naduma-duma a pagilian ken 28 a kameng ti pulisya, ti manarimaan a masapsapol.
Kabayatanna, inwaragawag dagiti otoridad idiay China a tallo met ti natay ken 265 dagiti missing iti parte ti border a sakop ti Gyirong county idiay Tibet kalpasan a maputed iti komunikasyon, kuryente, ken kalsada gaputi nakaru a mudslide.
Apektado pay iti nalawa a pannakadadael iti pakabuklan a suplay ti enerhiya idiay Nepal kalpasan a dinadael ti dakkel a layos iti nasurok-kumurang a 430 Megawatts a kapasidad ti kuryente manipud kadagiti hydropower ken solar facilities.
Gaputi nakaru a perdisyon iti mala-higante a layos, nagpanawagan ti panagkaykaysa ni Nepal Prime Minister Balendra Shah ken kimmiddaw ti tulong kadagiti kabangibang a pagilian nga India ken China para iti panangiyakar dagiti apektado nga umili ken panagsapol kadagiti biktima.
Nangiyuswat ti Nepal Army ken rescue teams manipud naduma-duma a sektor iti nalawa a search and response operations babaen ti panangusar dagiti helicopter ken specialized units tapno matulungan dagiti residente a naipit iti trahedya.
