Nan-anayen a naisubli ti Microsoft Corporation, a nakabase idiay Redmond, Washington, United States, dagiti serbisyo nga Outlook, Teams ken dadduma pay nga aplikasyon kalpasan ti nasurok 24-oras a global outage a nakaapektar kadagiti negosyo, opisina ti gobierno ken dadduma pay nga organisasyon iti nadumaduma a paset ti lubong.
Pinasingkedan ti Microsoft a nan-anayen a narisut dagiti teknikal a parikut a nakaigapuan ti nasaknap a pannakaitantan iti serbisyoda.
Maibasar kadagiti report, nasurok a 7.4 milion a report ti parikut ti nairekord iti intero a lubong, nga agdagup iti dandani 20,000 iti kada minuto. Karaman kadagiti apektado a serbisio ti panangipatulod ken panangawat iti email, panangmanehar kadagiti kalendario ken panangisayangkat kadagiti birtual a miting.
Adda met iti nagbalin nga epekto iti daytoy iti operasion ti sumagmamano nga ahensia ti gobierno, airlines, banko ken pinansial a kompania.
Idiay Taiwan, napilitan ti dadduma a pinansial nga institusion nga agusar iti fax tapno mapasingkedan dagiti transaksionda gapu iti saan a panaggana dagiti serbisio ti email.
Inlawlawag ti Microsoft a nagtaud iti teknikal a parikut iti network capacity upgrade-da ken panagbalbaliw ti network.
Inlawlawag pay ti kompania nga awan ti nasarakanda a pakakitaan ti cyberattack iti nasao nga insidente ken dimmawat daytoy iti dispensar kadagiti kustomer ken organisasion a naapektaran iti pannakataktak.
