Nagpanawagan ti Amnesty International Philippines ti madagdagus ken awan kondision a pannakawayawaya dagiti 300 a protesters nga inaresto iti kangitingitan ti aksionda mainaig iti pannakalukat ti maika-49 nga ASEAN Summit idi napan a Nobiembre 15 sadiay Siudad ti Pasay.

Iti nairuar a statement, kinondenar ti organisasion ti mapapati a panangusar ti nalabes a puersa ti Philippine National Police (PNP) kontra kadagiti demonstrador ken kameng ti media a mangipadpadamag iti protesta.

Segun kenni Amnesty Philippines Section Director Ritz Lee Santos III, mangipakpakita ti panagusar ti puersa dagiti pulis ken ti agtultuloy a kultura ti kinaawan responsibilidad, a nangitunda pay a maysa a rason para ti panagprotesta dagiti umili.

Karaman kadagiti kidkiddawen ti organisasion ti pannakawayawaya ti siam nga indibidual a natiliw idiay Liwasang Bonifacio bayat ti pannakipasetda iti martsa nga agturong iti Philippine International Convention Center (PICC), nu sadino a naangay ti pannakalukat ti ASEAN Summit.

Kabayatanna, dinepensaran met ti National Capital Region Police Office (NCRPO) ti nagbalinda nga addang, ken kinuna a naaramid dagiti pannakaaresto kalpasan a mapapati a nagkedked dagiti demonstrador nga ag-disperse ken nangisayangkat kadagiti protesta nga awan ti umno a permit.

Impaganetget ti NCRPO a ti kangrunaan a prioridadda ti panangtaginayon iti kinatalged ken seguridad dagiti delegado a dimmar-ay iti ASEAN Summit.

Innayon pay ti pulisya, a bigbigenda ti karbengan dagiti umili nga agprotesta, ngem saan a kayat a sawen daytoy a maipalubosen ti panaglabsing kadagiti linteg ken panagsukir kadagiti otoridad.