Pinasingkedan ni Presidente Ferdinand “Bongbong” Marcos Jr. nga awan iti mapirmaan a katulagan mainaig iti US-led Pax Silica Initiative iti panagbisita ni United States President Donald Trump ditoy Pilipinas.

Kinumpirma na daitoy sakbay iti bilateral meeting da ni Trump idiay Malacañang, kalpasan a damagen dagiti journalist nu adda nakaituding a panagpirma iti maysa a framework agreement para iti nasao nga inisyatiba.

“Not on this trip. We are not covering that on this trip,” kinuna ni Pres. Marcos

Immunan nga imbatad ni US Ambassador to the Philippines Lee Lipton nga awan iti mapasamak a panagpirma ti katulagan.

Saan met a kayat a satwen a maisardengen iti singasing a katulagan.

Maipalagip a kinuna ni Philippine Ambassador to the United States Jose Manuel Romualdez a kasapulan pay nga urnusen ti dua a pagilian dagiti detalye ti katulagan sakbay a maisapinal daitoy.

Imbinglay met ni Department of Trade and Industry Undersecretary Ceferino Rodolfo a target latta a mapirmaan iti legal framework ti Pax Silica sakbay nga agturpos iti tawen 2026.

Tarigagay ti nasao nga inisyatiba a papigsaen iti supply chain para iti napapateg a teknolohiya kas ti semiconductors ken artificial intelligence.