Kinarit ni House prosecutor panel ken Manila 3rd District Rep. Joel Chua ti kampo ni Vice President Sara Duterte nga ipamaysa iti depensada iti panagsungbat kadagiti alegasyon ti unexplained wealth, imbes a mangipakita laeng kadagiti dokumento a mangpaneknek iti rehistro kadagiti negosyo.
Daytoy ket sakbay ti pannakaituloy ti impeachment trial iti Senado inton bigat, Nobiembre 19, no sadino a naituding nga idatag ti Depensa ti uppat a testigo bayat ti dua nga aldaw a hearing.
Segun kenni Chua, saan a kueskuestionen ti prosekusion ti rehistro ti Cale88 Foods Corporation iti Department of Trade and Industry (DTI), kasta met ti pannakairehistro iti Food and Drug Administration (FDA) ti produkto a banana chips ti kompania.
Impaganetget ti mammanday-linteg, a saan nga daytoy ti kangrunaan nga isyu iti impeachment trial agsipud ta kasapulan pay laeng a sungbatan ti Depensa dagiti alegasion mainaig iti ginasut a milion a piso a mapapati a saan a naideklara iti kinabaknang ni Bise Presidente ken ti asawana a ni Manases Carpio.
Dinakamat pay ni Chua ti testimonia ti eksperto a testigoda a ni Atty. Alex Cabrera, a mapapati a nangipalgak iti nasurok P800 million a saan a naideklara a kita a nainaig iti bise presidente.
Impaganetget ti kongresista a saan a rumbeng a mailisi ti hearing iti kangrunaan nga alegasion a masapul a sungbatan ti kampo ni Duterte.
Agsubli inton bigat ti impeachment trial iti Senado, tapno idatag ti depensa dagiti testigo a mangsupring iti alegasion mainaig iti artikulo II ti impeachment complaint a mainaig iti saan a nailawlawag a kinabaknang.











