Pinasingkedan ni Atty. Salvador Paolo Panelo Jr., spokesperson ni Bise Presidente Sara Duterte, a natalged a nabawi ti dua a sigud nga household staff members ni VP sara babaen iti tulong ti legal teamna ken pulisya idi kalman, Nobyembre 17, 2026.

Maibasar iti salaysay dagiti dua a sigud nga empleyado nga inruar ni Panelo ita a Mierkoles, Nobiembre 18, maipagarup a narekrut ida ti maysa a pribado nga indibidual idi Oktubre 2026 nga agtrabaho iti maysa a resort sadiay Boracay ngem naiturong dagitoy idiay Manila gapu iti rason a kasapulan pay dagitoy nga agsanay.

Idi Nobiembre 16, binalakadan ida ti employerda nga adda iti mapapati a pangta iti biagda ken kasta met kenkuana gapu iti panangkupkop kadakuada, kagiddan iti panangipaganetget a mapukaw laeng ti nasao a pangta no pirmaanda dagiti nakasagana nga affidavit a mapapati a naglaon iti palso nga alegasion kontra ken ni Duterte.

Mapapati a nagkedked dagiti dua a pirmaan dagiti nadakamat a dokumento, ken nupay nalawag a saanda a naibalud, nagtalinaedda iti kustodiya ti employerda gapu iti buteng agingga a nagkiddawda iti tulong iti Bise Presidente.

Dagus met a sinundo ti legal team ken dagiti pulis dagiti dua idi kalman ket naiturongen dagitoy iti police station tapno agaramid iti sworn statement ken agpa-police blotter.

Segun iti kampo ti Bise Presidente, nalapdan ti mapapati a plano ti panangaramat kadagiti dua para iti palso a testimonia, idinto a nagkedkedda a mangipaay iti kanayunan pay a detalye tapno masigurado ti kinatalged dagiti karaman.