Pinagkedkedan dagiti umili idiay Queensland, Australia iti plano a pannakaibangon iti dakkel a data center nga usaren ti kompania ti artificial intelligence nga Anthropic, maibasar kadagiti dokumento a naisubmitir iti lokal a gobierno.
Kadagiti dandani 600 a komento ken panagkedked a naawat ti proyekto, dua laeng kadagitoy ti nangiyebkas iti suporta idinto ta maysa ti nagtalinaed a neutral. Ti nabatbati ket nagkedked wenno kimiddaw a maitantan ti proyekto agingga a mataming dagiti isyu maipapan iti aglawlaw.
Karaman kadagiti kangrunaan a pakaseknan dagiti umili ket ti nangato a konsumo ti koriente ken danum, posible a panagngato ti presio ti enerhia, arimbangaw, pannakadadael dagiti kalsada gapu kadagiti aktibidad ti panagbangon ken panagadu ti panagkasapulan iti panangipasdek ti balay.
Mapatta-patta nga umabot iti 1.44 gigawatts ti manamnama a konsumo ti koriente ti pasilidad, a karaman kadagiti kadakkelan a data center idiay Australia.
Kabayatanna, kinuna ti developer a ni Zerra DC a napasnek nga ad-adalen da dagiti reklamo ti komunidad ken papigsaenda ti konsultasyon kadagiti umili sakbay nga ituloy ti nasao proyekto.











