Papapigsaen ti Provincial Government of La Union (PGLU) iti kabaelan dagiti lokal nga opisyal a mangidaulo ken mangitandudo dagiti programa a mangpasayaat iti panag-negosyo ditoy probinsia.

Naisayangkat iti dua nga aldaw a Capacity Development Training iti panangidaulo ti Local Economic Enterprise and Investment Promotion Office (LEEIPO) para kadagiti miyembro ti Association of La Union Local Economic Development and Investment Promotion Officers (ALULEDIPO) idi Oktubre 29 agingga 30, 2026, idiay Ynad’s Place Hotel and Resort.

Kangrunaan a tarigagay ti panagsanay nga iwanwan dagiti lokal a gobierno iti panagsagana ti bid book da para iti Most Business-Friendly LGU Awards ti Philippine Chamber of Commerce and Industry (PCCI), karaman iti panag-awat dagiti pagalagadan ken dagiti indikasyon, kasta metten iti umno a dokumentasyon dagiti programa ken proyekto da.

Dinakamat met ni PCCI Project Lead Joseph Russell O. Ponce iti umuna nga aldaw dagiti standard iti panagpili, napapateg nga elemento ti panagsukimat ken dagiti naballigi a wagas dagiti nabigbig a lokal a gobierno.

Kabayatanna, nakapamaysa met iti maikadua nga aldaw iti panagsurat, panangilanad dagiti naaramid ken aktuwal a panagsagana ti bid book iti panangidaulo ni DepEd Region I Education Program Supervisor Dr. Juner Windel M. Valdez.

Impaganetget met da PCCI Regional Governor Xavier B. Mercado ken Chamber of Commerce and Industry of La Union President Anne Maureen Tan ken iti kinapateg ti naurnos a panangimaton ken panagtitinnulong ti gobierno ken pribado a sektor tapnu mapapigsa iti aglawlaw para kadagiti negosyo.

Babaen ti panagsanay, al-allukoyen ti LEEIPO ken ALULEDIPO dagiti dadduma a lokal a gobierno ti La Union a makipaset iti nasao a pammadayaw ken usaren dagiti nasursuro a wagas tapnu maamwan dagiti kinakurang ken mapabileg dagiti polisiya, sistema, ken serbisyo nga adda pakainaigan iti panangpasayaat ti negosyo.