Inlawlawag ni Presidente Ferdinand Marcos Jr. nga tarigagay ti Pilipinas a maaddaan iti ad-adu a pagalaan kadagiti kangrunaan a produkto kalpasan ti panangibaga ni United States President Donald Trump nga ag-import ti pagilian ti amin a kasapulanna iti agrikultura ken enerhia manipud America mangrugi inton Enero 1, 2027.

Iti pannakiuman iti media kalpasan ti 33rd Asia-Pacific Economic Cooperation (APEC) Economic Leaders’ Meeting sadiay Shenzhen, China, kinuna ni Marcos a saan a kayat a sawen ti pannakalukat ti merkado ti Pilipinas iti Estados Unidos ket sadiay laengen ti pagalaan kadagiti produkto ti agrikultura ken enerhia iti pagilian.

Segun iti Presidente, panggep ti gobierno ti ad-adu a supplier tapno masigurado ti umdas a suplay dagiti kangrunaan a kasapulan dagiti Pilipino. Napateg daytoy nga addang tapno mapalawa ti panagtagilako, ad-adu ti pagpilian iti panagangkat, ken mataginayon ti seguridad ti suplay ti taraon ken enerhia.

Manamnama a makatulong ti nalawlawa a relasion iti komersio tapno mapatalged ti ekonomia ti pagilian.