BR LA UNION – Dimmatag idiay Department of Justice idi kalman, Abril 7, 2026 ni Presidential Communications Office (PCO) Acting Secretary Dave Gomez tapno ipulong ken pa-imbestigaran dagiti fake news peddlers nga agiwar-waras ti disinformation seknan iti sitwasyon ti enerhiya ditoy pagilian.
Iti panagturong ti opisyal iti nasao a departamento, nangipila ni Gomez ti reklamo maikontra iti adda iti likudan ti Facebook page a “Malasakit News Pilipinas” a maipagarop a nangi-post ti palso nga impormasyon seknan iti energy lockdown ken papa-imbestigaranna nu siasino dagiti administrators wenno adda iti likudan ti nasao a page.
Mainaig ti daytoy, nagballaag ti Presidential Communications Office (PCO) nga awan ti santuen ti gobyerno iti panangkamat dagiti agiwar-waras ti “fake news,” partikular dagiti malisyoso nga impormasyon seknan iti First Family ken iti salun-at ni President Ferdinand Marcos Jr.
Segun kenni Secretary Gomez, mangipatungpal ti gobyerno ti “zero tolerance policy” kontra kadagiti indibidwal wenno grupo nga agparparbo ti istorya tapno agisaknap ti kina-salawasaw ken kaawan ti talek iti gobyerno.
Kinuna pay ni Gomez nga awan ti mapaboran ken mapagsungbat iti linteg ti amin nga adda iti likod dagiti pammadakes.
Ti ballaag ket kasaruno dagiti nakita a posts iti social media nga agiwar-waras ti biddut a report seknan iti estado ti salun-at iti Presidente ken isyu a pakairam-ramanan ti First Family.
Impaganetget pay ti sekretaryo a dagiti nasao a klase ti disinformation ket saan laeng a personal a panang-perdi ngem ketdi pangta iti seguridad ti pagilian.
Iti agdama, aktibo nga aggar-garaw ti PCO Anti-Fake-News Desk, kadwa ti Department of Justice (DOJ) ken National Bureau of Investigation (NBI), tapno maamwan dagiti source ken peddlers kadagiti nasao nga impormasyon.
