Binabalaw ni Bise Presidente Sara Duterte ti Philippine National Police (PNP) gapu iti maipagarup a panagbalin nga instrumento dagiti politiko, maikontra iti prinsipio nga agtalinaed koma daytoy nga apolitical wenno impartial.

Iti nairuar a statement, kinuwestiyon ni Duterte ti kababalin ti PNP kalpasan ti pananglawlawag ti institusion nga awan ti napasamak a rescue wenno pannakawayawaya iti sigud nga household staff member ti bise presidente iti maysa nga hotel sadiay Taguig City idi Nobiembre 17.

Impaganetget pay ti Bise Presidente a saan nga inaramid ti PNP ti umdas nga imbestigasion ken dagus a nangbukel iti konklusion sakbay a mailasin ti naan-anay a kinapudno.

Innayonna pay nga adda lima a dokumentado a pangta a nainaig iti PNP, ngem saan nan daytoy a maidatag iti impeachment trial kalpasan nga inikkat ti prosecution ti grave threats complaint kontra kenkuana.

Inyebkas pay ni Duterte ti panagbuteng para iti kinatalgedna ken kadagiti Pilipino a mabalin a makapadas iti pannakaabuso iti pannakabagi ti linteg.

Inallukoy met ni PNP Chief PGen. Jose Melencio Nartatez Jr. nga ad-adda a denggen ken tamingen dagiti reklamo ti publiko imbes nga ipangpangruna ti panangidepensa ti institusion ken dagiti adda iti turay.