LA UNION – Inakusaran ni sigud a Police Colonel Eduardo Acierto ni sigud a President Rodrigo Duterte a “protector” iti suspected drug lords nga isuda Michael Yang a sigud a presidential adviser ken iti negosyante a ni Allan Lim nga am-ammo kas ni Lin Weixiong.
Iti panagparang ni Acierto iti House Quad Committee hearing idi kalman, kinunana a nasinged a gayyem da Yang ken Lim ni Duterte.
Idi 2017, a naamwnan ti grupo ni Acierto ti pannakairaman da Yang ken Lim iti illegal a droga.
Segun ken ni Acierto, sigurado isuna gapu iti napasamak kadagiti kakadwa na, ket prinotektaran ti sigud a Presidente dagiti dua a gagayyemna.
Istorya ni Acierto a nadukot da Capt. Lito Perote ken MSgt Gerry Liwanag.
Awan pay laeng ni Perote idinto a napaltogan-natay ni Liwanag.
Imbutaktak ni Acierto nga addaan ni Yang iti nalimed a laboratoryo ti shabu idiay Dumoy, Davao City nga agar-aramid ti shabu.
Maibasar iti drug matrix nga insagana ti grupo ni Acierto, ni Yang ket kameng ti Johnson Chua drug syndicate nga idauluan ti Johnson Co a nakabase idiay mainland China.
Idinto a ni Lim ti mangipatpataray iti clandestine laboratory idiay Cavite a rinaut ti PDEA idi Hulyo 2018.
Kinuna ni Acierto, iti nadakamat a matrix ket karaman iti insubmitirna iti sigud a hepe ti PNP a ni Ronald Dela Rosa ken sigud a PDEA Director General Aaron Aquino ken sigud a PNP Chief Oscar Albayalde.
Kabayatanna, nainget met a pinaglibakan ni sigud a PDEA Dir. Gen. Wilkins Villanueva a saan a nagparang iti listaanda iti nagan ni Michael Yang a karaman iti illegal a droga.
