BR LA UNION – Tinubngar ni Armed Forces of the Philippines (AFP) Chief of Staff General Romeo Brawner Jr. ti panawagan iti militar nga ibabawi ti suporta da kenni President Ferdinand Marcos Jr.
Iti maysa a forum, inbutaktak ti AFP chief nga adda ti sumagmamano a retirado nga opisyal manipud puwersa armada, nga immasideg kenkuana ken ginandat a kumbinsiren ti sumagmamano nga ubbing nga opisyal ken commanders a makibiang iti naduma-duma a wagas ti military interventions, posible a kudeta wenno military junta tapno “i-reset ti intero a Philippine society” wenno ibabawi ti suporta iti Presidente.
Napasamak ti nasao nga addang ti anti-Marcos sakbay ti naisayangkat a nalawa nga anti-corruption protest idi Setyembre 21 kasaruno ti naibulgar nga anomaliya iti flood control projects.
Ngem segun iti AFP chief, awan ti kastoy nga aktibidad a napasamak iti kangitingitan ti protesta.
Segun kenni Gen. Brawner, kas maysa a chief of staff, kumpiyansa nga awan ti miyembro ti AFP ti dumngeg iti panawagan ti sumagmamano a sektor wenno indibidwal tapno makibiang gaputa addaan ti propesyunalismo ti puwersa armada ti pagilian.
Immunan a pinaglibakan ti Department of National Defense (DND) dagiti ispekulasyon seknan iti posible a malutluto a kudeta ti militar kontra iti administrasyon Marcos.
Impaganetget ni Defense Sec. Gilbert Teodoro nga awan ti naggandat iti AFP nga aramiden daytoy.
