Nag-isyu iti nainget a pammakdaar ti Armed Forces of the Philippines (AFP) kontra iti panangiwaras kadagiti fake news ken pasadya a biddut nga impormasyon mainaig kadagiti operasyon idiay West Philippine Sea (WPS).
Binabalaw ti AFP ti gandat ti China nga allilawen ti publiko babaen ti panangaramat ti daan wenno recycled footage a pinagparang da a baro nga insidente idiay Ayungin shoal.
Saan laeng kunana nga iresponsable ti kastoy a panangallilaw a taktika nu di ket panggep pay nga imanipula ti publiko, baliktaden ti kinapudno, ken pakapsuten ti nagkaykaysa a tignay ti Pilipino para ti sovereign rights ken hurisdiksiyon iti Pilipinas.
Laksid daitoy ket saan met a mapakpakapsotan ti Armed Forces of the Philippines iti panangdepensa ti soberaniya ken hurisdiksiyon a maiyannurot ti konstitusyon ken international law, partikular iti sidong ti United Nation Convention on the Law of the Sea (UNCLOS) ken ti 2016 arbitral award.
Pinaregta met ti AFP iti publiko nga agtalinaed a vigilante, iberipikar dagiti impormasyon, ken mamati laeng kadagiti mapagtalkan ken official sources. Impaganetget ti hanay a ti disinformation ket maysa a direkta a pangta iti national integrity isu a ti kinapudno ti kapigsaan a depensa ti pagilian.
Ti pammakdaar ket kasaruno ti rimuar a video ti panag-tow ti barko ti China Coast Guard iti Philippine vessel a nagresulta ti komprontasyon idiay Ayungin shoal. Nupay kasta, awan met ti petsa a nakakabil nu katno a napasamak iti insidente isu a kwestyonable ti panagbalin a lehitimo iti insidente.
