BR LA UNION – Nangisayangkat ti on-the-spot price monitoring ti Department of Agriculture wenno DA-Ilocos Region babaen ti nabukel a Regional Bantay Presyo Monitoring Team, kadagiti aglaklako ti bagas iti merkado publiko ditoy siyudad ti San Fernando, La Union.
Daytoy ket tapno siguradwen a sumursurot dagiti rice retailers iti panangipatungpal ti price cap a singkwenta pesos kada kilo iti imported premium rice, maiyannurot iti Executive Order No. 118.
Kabayatan ti inspeksyon, napalagipan dagiti rice retailers maipapan iti umno a panang-label iti ilaklako a bagas ken panangipatungpal ti naituding a presyo para iti imported premium rice.
Nangibunong pay ti grupo iti leaflet wenno polyetos a nakailanadan dagiti napateg nga impormasyon seknan iti Executive Order No. 118 tapno agserbi a giya ken palagip kadagiti aglaklako ti bagas.
Ti Regional Bantay Presyo Monitoring Team ket indaulwan ni Ms. Irene Tactac nga agpapaay kas Agribusiness and Marketing Assistance Division (AMAD) Chief iti Department of Agriculture – Regional Field Office I (DA-RFO I); kadwa na da Ms. Rhoda Galban ken Ms. Edilyn Goldara.
Naaprubaran ti price cap kadagiti imported premium rice tapno tulongan a maprotektaran dagiti consumers manipud iti food inflation, kasaruno ti nagbalin nga epekto ti nagsasaruno nga oil price hike gapwanan ti tensiyon idiay Middle East.
