Mangapela ti kampo ni Senador Ronald “Bato” dela Rosa maninaig iti desisyon ti Philippine National Police (PNP) nga ibabawi ti lisensya ken rehistro dagiti paltog na.
Nagtignay ti abogado na a ni Atty. Israelito Torreon a mailabsing ti linteg iti aramiden ti PNP agsipud ta kasapulan pay nga umuna nga adda iti pannusa, conviction, wenno court order sakbay a naan-anay a mababawi ti lisensya ti maysa nga indibidwal.
Impaganetget ti abogado nga awan iti kasta a sentensya wenno pammilin ti sadinuman a korte ditoy Pilipinas kontra kenni Dela Rosa.
Idi nadamag nu adda iti plano da nga i-surrender dagiti armas ket kinuna ni Torreon a nakadependir latta kenni Senador Dela Rosa iti maudi a desisyon.
Kabayatanna, pinasingkedan iti Police Regional Office 11 a pormalen a naiserbi ken naawat ti kampo ti Senador iti revocation order para ti License to Own and Possess Firearms (LTOPF) na kasta met dagiti rehistro ti paltog idi Miyerkules, Mayo 27.
Dinakamat met ni Atty. Torreon a pagpatangan da pay da Dela Rosa iti pannakikoordinar iti Regional Civil Security Unit (RCSU) 11 mainaig kadagitoy a rebokasyon kadagiti lisensya.
Nangrugi iti panangibabawi ti lisensya iti agdama a panagbirok kenni Senador Dela Rosa mainaig paylaeng ti arrest warrant nga impaulog kenkuana ti International Criminal Court (ICC).
