BR LA UNION – Namnamaen dagiti motorista a ngumato manen ti presyo dagiti produkto a petrolyo iti sumaruno a lawas, (Enero 21, 2025) a mangmarka iti maikatlo a lawas a panagngato ti presyo ti gasolina ken dadduma pay a produkto a petrolyo para iti tawen 2025.
Maibasar iti estimated fuel price changes inton Martes, kas maibasar iti international fuel trading iti napalabas nga uppat nga aldaw, agay-ayam iti P2.30 agingga P2.50 ti ngumatuan iti kada litro ti Kerosene; P2.30 agingga P2.60 iti kada litro ti Diesel bayat a 1.35 agingga P1.60 iti kada litro ti gasolina.
Kangrunaan a rason ti ngimmato a presyo ti krudo iti international market ket gaputi impataw a sanctions ti US ken UK kontra iti Russian oil.
Namnamaen a mangigubway daytoy iti panagkissay ti export ti langis manipud Russia, nga isu met ti nangiduron ti panagngato ti presyo ti krudo iti sangalubongan a merkado
Idi Enero 14, 2025, nagipangato dagiti kompanya ti langis ti P0.80 kada litro para iti gasolina ken kerosene, P0.90 kada litro para iti diesel.
Daytoy ti maikadwa a nagsaruno a lawas a ngimmato ti presyo ti petrolyo ita a tawen.
Iti agdama, iti pakabuklan a panagngato ti presyo ti gasolina ken kerosene ket P1.80 kada litro, ken P2.30 kada litro iti diesel.
Idiay Metro Manila, ti agdama a retail price iti petroleum products ket iti sumaganad:
Gasolina: P52.25 agingga P75.62 kada litro
Diesel: P49.00 agingga P65.85 kada litro
Kerosene: P70.91 agingga P82.20 kada litro
Kabayatanna, namnamaen ti Department of Energy (DOE) a dagiti kompanya ti langis ket ag-anunsyo ti opisyal a panagbaliw ti presyo tunggal Lunes, ken maipatungpal iti kabigatanna, aldaw ti Martes.
