LA UNION – Posible a maapektaran iti pakabuklan a 669,923 ektarya ti kapagayan iti panagduprak ti bagyo Gener, maibasar iti datos ti Philippine Rice Informationa System (PRiSM).
Manipud iti aganay 670,000 ektarya ti kapagayan, pakabuklan a 367,583 nga ektarya ti addan iti reproductive stage wenno dandani ag-dawa.
Adda met ti pakabuklan a 302,341 nga ektarya ti addan iti ripening phase wenno asidegen nga apiten.
Dagitoy ket manipud Central Luzon, Cagayan Valley, Ilocos Region, ken dadduma pay.
Kabayatanna, impadamag ti Philippine Rice Informationa System a sakbay ti panagduprak ti bagyo Gener ket nalpasen a naapit dagiti mannalon ti pakabuklan a 348,373 ektarya ti kapagayan.
Immunan nga impadamag ti Department of Agriculture nga aganay P2.26 billion ti naperdi iti epekto ti bagyo Enteng iti sektor ti panagtalon.
Nasurok P1.11 billion ditoy iti nadetermina nga epekto ti bagyo iti kapagayan wenno kaibatugan ti pakabuklan a 34,935 nga ektarya wenno 48,646 metriko tonelada a produksyon.
