LA UNION – Mabalin a mabalud manipud 609 agingga 1,218 a tawen da sigud a Bamban, Tarlac Mayor Alice Guo ken kakadwa na nga akusado nu mapaneknekan a guilty iti money laundering charges.
Iti panagtultuloy ti imbestigayson ti Senado seknan iti panaglibas ni Alice Guo ditoy pagilian, imbaga ni Anti-Money Laundering Council lawyer Adrian Arpon nga iti sidong ti Anti-Money Laundering Act para iti Section A,B ken C, kaibatugan ti 7 a tawen agingga 14 a tawen a pannakaibalud ti dusa ti tunggal bilang ti na-commit a money laundering.
Kabayatanna, impaka-ammo ni Senate Deputy Minority Leader Risa Hontiveros, chair ti subcommittee a mangidadaulo ti inquiry, kenni Sheila Guo a present iti nasao a panagdengngeg a mabalin a mabalud kadwana ni Alice ken dadduma pay, iti nalab-labes ngem maysa a lifetime.
Maipalagip a nangidatag ti Anti-Money Laundering Council ken Presidential Anti-Organized Crime Commission ti 87 a bilang ti money laundering kontra kada Alice Guo, Sheila Guo, Cassandra Li Ong, sigud a Technology and Livelihood Resource Center (TLRC) Deputy Director General Dennis Cunanan ken 28 pay gapu iti pannakairaman da iti operasyon ti naraut a Philippine Offshore Gaming Operators a nadiskubre nga involved iti illegal nga aramid.
Nagramot dagiti naidatag a kaso iti P7 billion a maipagarop a nausar para kadagiti operasyon ti illegal POGO hub a rinaut dagiti otoridad idiay Bamban, Tarlac.
