BR LA UNION – Nagnayon pay ti ibur-burwang a danum iti dua a kadadakkelan a dam iti Amianan a Luzon, ti Ambuklao ken Binga dam gapwanan ti awan sarday a panagtudo iti watershed areas dagitoy.
Manipud iti sigud a 213 cubic meters per second (cms) nga ibur-burwang ti Ambuklao dam idi Biyernes ket ngimmato idi kalman agingga iti 246.5 cms, kasaruno iti pannakalukat ti maysa pay nga spillway gate.
Dakdakkel ti bulto ti danum nga ibul-bulos ti Binga nga umabot iti 327.25 cms. Daytoy ket nasurok 100 cms ti danum manipud iti sigud a 225 cms idi Biyernes.
Uppat nga gate ti nasao a dam ti agdama ita a nakalukat manipud iti sigud a dua nga spillway.
Laksid kadagiti nakalukat a gate, nanayunan pay iti bulto ti danum idiay Ambuklao nga immabot iti 751.70 meters ti lebel na itdi kalman, daytoy ket maysa a sentimetro laengen sakbay a madanon iti Normal High Water Level (NHWL) a 752 meters.
Apagapaman a bimmaba iti tukad ti danum idiay Binga ngem agtaltalinaed a nangato agsipudta sumagmamano laengen a sentimetro ket madanonen ti Normal High Water Level a 575 meters.
