BR LA UNION – Kinaswan ti Office of the Ombudsman ni sigud nga Overseas Workers Welfare Administration (OWWA) Administrator Arnell Ignacio ti Usurpation of Official Functions seknan iti kontrobersyal a P1.4 billion property acquisition ti ahensiya.
Segun kenni Department of Migrant Workers (DMW) Secretary Hans Leo Cacdac, naawat ti opisina da idi Hulyo 7, 2026 iti resolusyon ti Ombudsman ken nakaikabil ditoy a pinirmaan ni Ignacio iti contract to sell, ken deed of absolute sale ti transaksiyon.
Maipagarop nga inaprubaran na pay ti pannakaipalospos ti pondo ti gobyerno, ngem awan ti pammalubos ti OWWA Board of Trustees.
Segun iti Ombudsman, nagtignay ni Ignacio nga arigna adda bileg na manipud OWWA Board, nga uray ammo na nga awanan ti otoridad.
Gaputi dayta, imbaga ti ahensiya a saan laeng a simple nga administrative non-compliance daytoy, ngem ketdi maysa a krimen ken panaglabsing iti Usurpation of Official Functions.
Kabayatanna, imbasura met ti Ombudsman iti corruption complaint kontra iti sumagmamano a sigud nga opisyal ti OWWA ken dagiti pribado nga indibidwal a karaman iti panangilako ti daga.
Imbaga ni Cacdac nga agsumite ti DMW ti Motion for Reconsideration tapno kiddawen iti Ombudsman a sukimaten manen dagiti nasao a reklamo.
