BR LA UNION – Agtalinaed ni sigud a Negros Oriental Congresman Arnolfo “Arnie” Teves Jr. iti detention facility ti National Bureau of Investigation (NBI) idiay New Bilibid Prison (NBP) idiay Muntinlupa City agingga iti nakatuding nga arraignment.
Segun kenni Department of Justice (DOJ) spokesperson Mico Clavano, awan pay iti naawat da nga order manipud korte para iti naka-schedule nga arraignment wenno panangibasa ti darum kontra kenni Teves.
Agingga nga awan pay ti naiyisyu nga order iti korte, agtalinaed a nakabalud ti sigud a mammanday linteg iti nasao nga NBI facility.
Ad-adalen pay ti Prosecutor General a komunsulta kadagiti prosecutor nga akin-iggem ti kaso ni Teves iti posible a consolidation wenno pagmamaysaen ken iyakar iti agtutuon a kaso a naidatag kontra iti sigud a mammanday linteg manipud iti probinsiya agturong idiay Manila, kalpasanna, mangidatag da ti maiyannatop a mosyon iti korte.
Maipalagip a sumangsango ni Teves iti agtutuon a kaso a murder idiay Manila Regional Trial Court Branch 12, Branch 15 ken iti Bayawan RTC Branch 63.
Sumangsango pay ni Teves kadagiti kaso nga illegal possession of firearms and explosives idiay Manila RTC Branch 12; panaglabsing iti Terrorism Financing Prevention and Suppression Act of 2012 a naidatag idiay Quezon City RTC Branch 77; ken maysa a kaso ti Terrorism Financing Prevention and Suppression Act of 2012 idiay Quezon City RTC Branch 77.
