Inawagan ti sigud a presidential spokesman Atty. Harry Roque kas maysa a “continuing pattern” iti harassment ti kaso a tax evasion ti naidatag a kaso kadagiti co-respondents ken kunkuana.
Kasaruno daitoy ti panangipila ti Bureau of Internal Revenue sadiay Department of Justice ti reklamo kontra kenni Roque, iti asawa na a ni Mylah Reyes Roque, ken kenni Percival Sazon Ortega mainaig ti tax violations ti Bianchan Holdings and Trading Inc., a sigud da a kukua.
Impaganetget ni Roque a ‘politically motivated’ ti kaso ken panggep laeng nga i-pressure dagiti suportador ti napalabas nga administrasyon.
Iti biang met ti Bureau of Internal Revenue, napaay dagiti respondents a mangisubmitir ti kasapulan a tax returns ken agbayad ti umiso a buis seknan ti panangiyakar ti shares of stock ken panagngato ti authorized capital stock iti nasao a kumpanya.
Pinaglibakan daitoy ti abogado ken kinuna nga awan ti aktwal nga issuance wenno subscription of shares, isu nga awan iti napasamak a taxable event.
Kinunana pay nga awan ti umdas a basaran ti alegasyon iti pagsungbatan ti buwis ken nasapa pay tapno mangiruar ti aniaman a desisyon.
