BR LA UNION – Iti low pressure area a nasaripatpatan iti laud a paset ti Ilocos Region ket naan-anayen a nabukel a bagyo, maawagan a bagyo “Fabian”.
Maibasar iti 11:00 AM bulletin ti PAGASA, naudi a nasaripatpatan iti bagyo fabian iti kaadayu nga 185 kilometro laud ti Batac, Ilocos Norte.
Kabuyog na ti angin nga agpigsa ti 45 kilometro kada oras asideg iti sentro ken kapegges a dumanon iti 55 kilometro kada oras.
Agtur-turong iti amianan-a-palaud a direksiyon iti kapartak a 10 kilometro kada oras.
Maibasar iti track ti PAGASA, agtululoy nga umad-adayu ti bagyo fabian ken namnamaen a rumwar met laeng iti Philippine Area of Responsibility (PAR) inton rabii wenno nasapa inton bigat ti Sabado, Agosto 9, 2025.
Mamantinir ti bagyo Fabian ti kapigsa na agingga a kumapsot ken agbalin a remnant low bayat ti panag-exit na iti PAR.
