LA UNION – Simrek iti Philippine Area of Responsibility (PAR) iti tropical Pulasan a maawagan ti bagyo Helen, alas 6:30 idi rabii, segun iti PAG-ASA.
Naudi a nasaripatpatan ti sentro ti bagyo iti kaadayu a 1,150 kilometro daya amianan-a-daya ti Extreme Northern Luzon.
Kabuyogna ti kapigsa ti angin a 85 kilometro kada oras asideg iti sentro ken kapegges nga umabot ti 105 kilometro kada oras.
Agtultuloy a dup-dupagen ti bagyo Helen iti laud amianan-a-laud iti kapartak a 25 kilometro kada oras.
Maibasar iti track forecast, ti bagyo HELEN ket agtalinaed nga adayu iti kadagaan ti Pilipinas iti pakabuklan a forecast period ken namnamaen a rumwar iti Philippine Area of Responsibility inton malem wenno rabii.
Kabayatanna, itay alas tres ti pabangon, iti tropical cyclone iti ruar ti PAR a sigud a bagyo Gener ket naudi a nasaripatpatan iti kaadayu a
405 kilometro laud ti Bacnotan, La Union, kabuyog ti angin a 55 kilometro kada oras asideg iti sentro ken kappeges a 70 kilometro kada oras.
Kabayatanna, iti mapaspasaran ita nga aldaw a nakuyem a panawen ken panagtudtudo iti dackel a paset ti pagilian ket epekto ti na-enhance a Southwest Monsoon wenno habagat, babaen ti napalabas a bagyo Gener ken bagyo Helen.
Dagiti lugar a makapadas ti nakuyem a panawen ken panagtudtudo kas epekto ti Southwest Monsoon ket idiay Palawan, Occidental Mindoro, ken Antique.
Sagpaminsan a panagtudo iti nabatbati a paset ti MIMAROPA, nabatbati a paset ti Western Visayas, Batangas, Zambales, Bataan, ken Pangasinan.
Mawaras-waras met a panagtudo ken panaggarru-od i mapasaran idiay Metro Manila, Zamboanga Peninsula, BARMM, Caraga, Northern Mindanao, Cordillera Administrative Region, Bicol Region, nabatbati a paset ti Visayas, CALABARZON, Central Luzon, ken Ilocos Region.
Malaksid ti natudo a panawen, naipaulog pay ti gale warning gaputi nadawel a kabaybayan iti western seaboard ti Central Luzon, Southern Luzon, ken Visayas.
