LA UNION – Dimmapo iti maysa a balay a pagar-aramidan ti walis-tambo wenno buybuy idiay Barangay Bilis Burgos, La Union kalpasan a nauram idi kalman, agarop alas 4:30 ti malem.
Kukua daytoy ti managan Maria Evasco, agtawen ti 68, residente ti Bauko, Mt. Province ngem iti agnanaed iti nasao a balay ket managan Caroline Bantasan, 70-anyos, awanan asawa, maysa a soft broom maker.
Base iti report, madama ti panagaramid ti buybuy ni Bantasan ken dagiti kakadwa na idi makaangot dagitoy iti kasla maur-uram.
Gaputa naaramid iti light materials ti nasao a balay, napartak ti panagkayamkam ti apoy a mapapati a naggapo iti kuwarto ti balay.
Nagresponde iti Burgos PNP, Naguilian-BFP, ken Sablan-BFP iti nasao nga insidente ket naideklara a fire-out iti oras ti alas 6:20 ti sardam.
Base iti report, aganay P67, 800 iti inisyal a perdisyon iti napasamak nga uram.
Kabayatanna, nagsagaba ti first degree burn ni Bantasan ket dagus a naiturong idiay Burgos RHU para iti pannakataming daytoy.
Iti agdama, dukduktalen dagiti fire investigators nu kasatnu a timpuar ti napasamak nga uram.