BR LA UNION – Naisubli ditoy Pilipinas ti bangkay ti Overseas Filipino Worker (OFW) a natay iti missile attack idiay Tel Aviv, Israel, segun iti Department of Migrant Workers (DMW).
Iti statement ti ahensiya, simmangpet ditoy pagilian idi Sabado ti bangkay ni Mary Ann De Vera, maysa a Filipina caregiver a natay iti panagbomba ti Iran. Kadwa na a nagawid ti asawana a ni Bernie Lavarias.
Segun iti DMW, personal a sinarungkaran ni Israeli President Isaac Herzog iti bangkay ti Pilipina ken nangidanon ti simpatiya iti pamilyana.
Kabayatanna, kinuna ni Dana Kursh, Israel’s Ambassador ditoy Pilipinas, nga inkari ti gobyerno ti Israel a mangipaay ti lifetime support iti pamilya ni De Vera.
Inlawlawag ni Kursh nga iti sidong ti linteg ti Israel, iti pamilya dagiti nasugatan wenno natay bayat iti panawen ti conflict , umili man ti Israel wenno ganggannaet, ket maikari iti lifetime benefits.
Inruar met ti Embassy of Israel ditoy Pilipinas ti statement tapno iyebkasna ti pakinakemna iti pamilya ti biktima.
Nangiruar ti waragawag ti Embassy of Israel in the Philippines tapno iyebkas ti simpatiya iti pamilya ti biktima.
Maipalagip a natay ti 32-anyos a ni De Vera iti missile attack idiay Tel Aviv idi Pebrero 28, kalpasan ti retaliatory strike ti Iran kalpasan ti panangraut ti Israel ken Estados Unidos iti Iran a nagresulta iti pannakatay ti gasut a tattao.
Iti sidong ti nasao a linteg, umawat ti pamilya ni De Vera iti pinansiyal a tulong manipud iti gobierno ti Israel, pakairamanan ti livelihood support.
Tubo ni De Vera ti Basista, Pangasinan, ken agtartrabaho idiay Israel kas caregiver sipud pay idi 2019.
