BR LA UNION – Agtultuloy ti panagdur-as iti panagtaraken ti bangus idiay Barangay Baroro, Bacnotan, La Union gapu iti agtultuloy a suporta ti Bureau of Fisheries and Aquatic Resources (BFAR), babaen iti proyekto a mariculture.
Ti nasao a proyekto a nailatangan ti aganay one million pesos ket dakkel a tulong tapno maipaayan dagiti bangus growers iti kanayunan a pannakaammo, alikamen, ken teknikal a suporta tapno mapaadu ti produksiyon dagitoy.
Dagiti barangay a benepisyaryo ti mariculture ket iti Tammocalao, Cabarsican, Pandan ken Baroro.
Kabayatanna, kinontrol ti lokal a gobyerno dagiti bangus cages idiay Barangay Baroro, maiyannurot iti code of practice iti aquaculture. Tunggal operator ket agbayad ti 100 pesos kada 100 a metro kuadrado a bangus cage.
Kasapolan a sumurot dagiti operator iti nasao nga allagaden agsipudta ti congestion iti fish cages ket agresulta iti panagbaba ti kalidad ti danum ken pannakapukaw ti oxygen level, a mabalin nga agresulta iti fish kill.
Gapu iti nasao nga allagaden, dagiti sigud nga 80 fish cages ket nagbalin laengen a 55.
Manamnama a mangrugi nga agapit dagiti bangus growers inton bulan ti Abril ti agdama a tawen.
