Nangipila ti kabaruan a reklamo nga kriminal ken administratibo iti kampo ti pamilya Duterte kontra kadagiti nangangato nga opisyal ti Marcos administration ken police officers ti Office of the Ombudsman ita nga aldaw ti Lunes, Setyembre 15.
Daytoy ket adda pakainaigan na iti panaka-arestar ti amana a ni sigud a Presidente Rodrigo Duterte idiay Ninoy Aquino International Airport (NAIA) idi Marso 11, agdama a tawen.
Iti 160 a pinanid nga affidavit complaint, inakusaran ni Davao City Acting Mayor Baste da Justice Secretary Jesus Crispin Remulla, DILG Sec. Jonvic Remulla, DND Sec. Gilbert Teodoro, NSA Eduardo Año ken dagiti dadduma pay nga opisyal ti kidnapping, arbitratry detention, grave misconduct, ken dadduma pay a panaglabsing iti linteg.
Nainaganan met kas respondent iti reklamo da sigud a Philippine National Police (PNP) Chief Gen. Rommel Francisco Marbil, former Criminal Investigation and Detection Group Director Maj. Gen. Nicolas Torre III, Prosecutor General Richard Anthony Fadullon, DOJ Undersecretary Nicholas Felix Ty, ken dagiti dadduma pay a pulis ken justice officials.
Nakailanad iti reklamo nga apagsangpet ti sigud a Presidente ditoy pagilian manipud Hongkong kadua iti pamilyana ken ni sigud nga Executive Secretary Salvador Medialdea ket inkapilitan a naiturong iti Villamor Air Base, nainget a nabantayan ti sumagmamano nga oras, sakbay a naiturong idiay The Hague, Netherlands nga awanan ti due process.
Napaidaman pay ni Duterte ti immediate access iti medical treatment iti laksid ti rikriknaen na a diabetic condition.
Daytoy metten iti nagduron kenni Acting Mayor Baste nga ituloy iti kaso agsipudta agtaltalinaed pay laeng iti amana a nakadetine iti sabali a pagilian ken saan na a kabaelan a mangipila dagiti kaso.###
