BR LA UNION – Agsagsagana ti National Bureau of Investigation (NBI) a mangipaay iti seguridad para iti panagdar-ay ni sigud a Negros Oriental representative Arnolfo Teves iti arraignment.
Inkeddeng ita nga aldaw ni Manila Regional Trial Court (RTC) Branch 12 Judge Renato Enciso ti arraignment ken pre-trial conference para iti kaso nga illegal possession of firearms and explosives ni Teves.
Kinuna met ni NBI Director Jaime Santiago nga ur-urayenda met ti bilin ti korte kalpasan a nangidatag ti abogadona a ni Atty. Ferdinand Topacio, ti mosyon nu mabalin a dumar-ay laengen ni Teves iti online hearing.
Sumagmamano a personnel ti NBI iti nakasaganan a mangibiyahe kenni Teves manipud iti pasilidad ti NBI iti Bureau of Corrections compound idiay Muntinlupa City agingga iti Manila RTC.
Ur-urayen met ti NBI ti commitment orders manipud kadagiti innem a korte nga akin-iggem iti kaso ni Teves.
Immuna a nangipaulog ti Manila RTC Branch 12 iti commitment order a nangibilin ti pannakaibalud ni Teves idiay Manila City Jail.
Iti sabali a bangir, agduadua ni Santiago a mabalin a maipaayan iti temporaryo a pannakawayawaya ni Teves gaputa kaaduan kadagiti kaso a sangsanguenna ket non-bailable.
