Binallaagan ni Bureau of Immigration (BI) Commissioner Joel Anthony Viado dagiti agtartarigagay nga agtrabaho iti ballasiw-taaw gapo iti panagngato ti bilang dagiti ilegal a mangidiay-diaya ti trabaho kadagiti nadumaduma a pagilian iti Asya, kasta met dagiti manglimlimo a recruiters a mangbikbiktima kadagiti Pilipino.
Dagiti innem nga repatriates ket buklen dagiti dua a lallaki nga agtawen ti 29 ken 27, ken uppat a babbai nga edad 21, 26, ken 29. Simmangpet da ditoy pagilian idi Mierkules ti bigat manipud Phnom Penh, Cambodia.
Segun ti BI, maysa kadakuada iti dimmalan ti ilegal a ruta wenno “backdoor” idiay Palawan, bayat a dagiti lima ket pimmanaw iti pagilian kas turista manipud Manila.
Maysa kadagiti biktima iti nangibutaktak nga iti kangrunaan a target ti operasion ket dagiti indibidual a mangmangged kadagiti pagtaengan da idiay Estados Unidos.
Dinakamat pay dagiti innem a biktima nga nadawatan isuda ti USD 2,000 aginggana USD 8,000 para iti panakawayawaya, ngem pinili da nga anusan iti sitwasion.
Maysa kadakuada iti nakatakas idi naibaon nga agturog iti maysa a mall tapno gumatang dagiti gamit.
Kaaduan kadagiti biktima ket namati kadagiti peke nga job advertisements ken naallukoy ti nangato a sueldo isu a simmali da kadagiti scam hub.
Innayon pay ni Viado, ipakpakita ti kaso iti baro a taktika dagiti trafficking syndicate a mangar-aramat iti Cambodia kas source, transit, ken destination country para iti human trafficking.###
