LA UNION – Inpakaammo ti Bureau of Immigration (BI) ti pannakipasetda iti Justice Caravan ti Department of Justice (DOJ) idi kalman Hulio 4 2024, a naangay idiay Dasmariñas Arena sadiay Dasmariñas, Cavite.
Ti Justice Caravan ket napateg a paset ti panagregget ti DOJ a mangyasideg dagiti nasken a serbisio ti gobierno iti publiko.
Aktibo pay a nakipaset dagiti nadumaduma nga ahensia ti gobierno, agraman ti BI, nga agtitinnulong tapno direkta a mangipaay iti nadumaduma a serbisio iti komunidad.
Impaganetget ni BI Commissioner Norman Tansingco ti kinapateg ti pannakipaset ti ahensia iti kastoy a caravan.
Kinunana a ti pannakipasetda iti kastoy a programa ket maysa laeng a panangipakita iti panagkumitda iti panangipaay iti serbisio publiko ken suporta kadagiti programa ti DOJ.
Kagiddan ti Justice Caravan nga insayangkat ti Department of Justice idi kalman, itukon ti BI ti nadumaduma a serbisio, pakairamanan ti tourist visa extension, aplikasion para iti dual citizenship, exit clearances, ken dadduma pay a kangrunaan a serbisio ti imigrasion.
