LA UNION – Dead on arrival iti ospital ti maysa a 68-anyos a lolo kalpasan a namindua a daras a nadungpar ti lugan iti national highway ti Quinavite, Bauang, La Union.
Nabigbig ti pimmusay a ni Romeo Flores, 68-anyos, residente ti Brgy. Pugo iti nasao nga ili.
Maibasar iti imbestigasion ti pulisia, naamuan nga agdaldalyasat iti kalsada ti ambulansia manipud pay probinsia ti Abra a minaneho ni Paolo Castillo, 38-anyos, idi nadungparna ti nakabisikleta a ni Flores a nairana a bimmallasiw iti kalsada.
Kasaruno ditoy ti pannakadayanggus manen ti tricycle a minaneho ni Richard Espilo iti biktima a nagbanag iti pannakaipuruakna iti kalsada.
Nagsagaba iti nakaro a sugat iti ulo ken bagina ti biktima a nangitunda iti pannakatay daytoy.
Agtultuloy ita ti imbestigasion dagiti otoridad kadagiti dua a driver.
