Mabalin nga agapela ti bayad-pinsala manipud iti International Criminal Court (ICC) dagiti biktima ti extra-judicial killings idi panawen ti nadara a gubat kontra droga.
Segun ken ni ICC-accredited lawyer attorney Joel Butuyan, adda makunkuna a “reparation stage” para kadagiti biktima iti tiempo a nadanonen ti pannakakonbikto no sadino ti mabalinen nga idatag dagiti biktimai dagiti ebidensia iti danyos a sinagaba da.
Inlawlawag ni Attorney Butuyan a maala ti bayad-pinsala manipud kadagiti recoverable assets ti akusado ken adda pay iti remedyo para iti panag-freeze kadagiti sanikua ti akusado bayat nga agtultuloy ti panagdengngeg.
Isu ket mabalin laeng a mangipila dagiti biktima ti EJK para iti pannakafreeze ti assets ti sigud a presidente a ni Rodrigo Duterte kalpasan ti pannakapasingked dagiti kasona a naikeddeng inton Setiembre 23 ken saan pay ita gapo ta saan pay a kumpirmado dagiti kaso kontra kenkuana.
Apaman nga awan ti recovery assets manipud iti akusado, addaan ti ICC iti trust funds para kadagiti reparasion.
Nupay kasta, saan a manamnama ti dakkel a gatad a maawat agsipud ta katupag laeng daitoy iti pangegosyo ken dadduma pay nga aktibidad a saan laeng a limitado ti monetary damages.
Mainayon pay, ti international tribunal ket mabalin met a mangipaay iti sikolohikal a suporta ken dadduma pay a tulong kadagiti naapektaran a pamilia a mangbangon iti biagda kalpasan dagiti krimen a naaramid kadakuada.
