LA UNION – Umaboten iti 17 ti kaso ti firework-related injuries a nailista ti Department of Health (DOH) manipud Disyembre 22 agingga 23 sakbay iti selebrasyon ti paskua ita a tawen.
Iti maysa nga statement, impadamag ti ahensiya a nailista dagiti nasao a kaso manipud iti 62 sentinel hospitals a banbantayan ti Department of Health (DOH).
Kadagiti nasao a kaso, kaadwan wenno aganay 16 ditoy ket lallaki nga agtawen ti 19 agpababa bayat a ti maysa a babai a biktima ket mapatta-patta a 20-anyos agpangato.
Aganay 15 wenno 88% a kaso ket gapwanan ti ilegal a paputok partikular ti boga.
Nangatngato dagiti nabiktima ti paputok iti nadakamat a period iti 113% kumpara iti 6 a kaso a nailista iti kapada a panawen idi 2023.
Mainaig ti daytoy, nagpalagip ti DOH iti publiko a liklikan ti agusar ti anyaman a klase ti paputok, imbes ket agusar laengen iti alternatibo nga agparnuay ti ariwawa a kas ti tambor, torotot, ken dadduma pay.
Kasta metten, pawilan dagiti ubbing nga agpaputok.
Mabalin met ti tumawag iti National Emergency hotline iti numero 911 ken 1555 para iti DOH hotline nu agkasapolan ti tulong.
