Agarup 70 ti bilang dagiti pasiente nga agdama a maag-agasan iti National Kidney and Transplant Institute wenno NKTI a naapektaran iti leptospirosis.
Segun kenni NKTI Deputy Executive director for medical services Romina Danguilan, kasapulan nga agpa-dialysis ti amin a pasyente.
Iti press conference, kinuna ni Danguilan a malaksid iti kidney, ti pancreas ken uray ti dalem dagiti pasyente ket naapektaran pay.
Gapu iti iyaadu ti bilang dagiti pasiente a naapektaran iti leptospirosis, nangikabil ti gym ti ospital ti NKTI iti ward extension.
Gapu iti daytoy, inawagan ti liderato ti NKTI ti Department of Health a mangted kadakuada iti kanayonan a 20 nurses ken 10 a doktor tapno maited ti umdas nga atension iti agtultuloy a panagadu ti bilang dagiti naapektaran iti leptospirosis.
Iti rekord ti NKTI, nangrugin nga immadu ti bilang dagiti naiyeg a pasiente ti leptos kalpasan ti layus a pinataud ti bagyo Carina ken pinapigsa pay ti southwest monsoon.
