Dumanon ti 27 ti bilang dagiti pimmusa iti panagreggaay ti Binaliw landfill idiay Cebu City kasaruno a makali dagiti otoridad ti maysa manen a bangkay idi laeng aldaw ti Biernes.
Segun iti lokal a gobierno ti Cebu City, siyam (9) nga indibiwal pay ti agtaltalinaed a mapukpukaw kabayatan ti panagtultuloy ti search and rescue operations laksid ti mapaspasaran a panagtudo iti nasao a ciudad.
Nagsapata dagiti otoridad a saan da nga agsardeng agingga saan a masarakan dagiti nabatbati a biktima.
Kabayatanna, bimmisita met iti landfill site ni Cebu Archbishop Albert Uy tapno makiladingit kadagiti natayan a pamilya a sakbayna ket nagkeddengen iti tulong ti Department of Environment and Natural Resources kadakuada.
Maipalagip a napasamak ti trahedya idi pay Enero 8 idi nareggaay ti aganay 20-a-kadsaaran a kangato a bantay ti basura sadiay Binaliw Landfill, maysa a pribado a pasilidad a mangimatmaton kadagiti agarop milyon a residente ti Cebu City.
