BR LA UNION – Pormal nga indatag ti Bureau of Internal Revenue (BIR) iti kaso a tax evasion kontra iti agassawa a Sarah ken Curlee Discaya, kalpasan a matakwatan iti maipagarop a saan a panagbayad ti buwis nga umabot iti nasurok P7.1 bilyon.
Personal nga indatag ni BIR Commissioner Romeo Lumagui Jr. ti reklamo iti Department of Justice (DOJ) itay agsapa, kagiddan iti panangidatag ti kaso kontra iti maysa a corporate officer ti St. Gerard Construction Gen. Contractor and Development Corporation, a konektado iti Discaya couple.
Segun iti BIR, rimwar iti nainget a panagamiris a dadakkel ti tax deficiencies ti kompaniya ken dagiti opisyal daytoy, kabilang ti saan a deklarado a birok ken saan nga umno a panag-file ti tax returns.
Ti nasao nga addang ket paset iti napairutan a kampanya ti ahensya kontra iti dadakkel a tax evaders ditoy pagilian.
Iti sidong ti Run After Tax Evaders (RATE) Program ti BIR, tarigagay a mapagsungbat dagiti indibidwal ken korporasyon a manglab-labsing iti linteg ti panagbuwisan, tapno mapapigsa iti koleksyon ti pondo para iti kangrunaan a serbisyo ti gobyerno.
