Saan a pabor ni Bise Presidente Sara Duterte iti amin a klase ti online gambling.
Daytoy iti nagbalin a dasig ti Bise Presidente iti isyu ti online gambling iti kangitingitan ti nalawa a panagsaknap daytoy ditoy pagilian a nangduron kadagiti sumagmamano a manmanday-linteg a mangisingasing ti linteg tapno naan-anayen a maiparit daytoy.
Iti maysa nga interview kenni Bise Presidente Sara idiay The Hague, Netherlands, impaganetget na iti peggad nga ipapaay ti online gambling partikular kadagiti agtutubo a saan a mabanbantayan wenno makonkontrol dagiti nagannak da a maka-access iti internet.
Innayon pay ti Bise, naaramiden a nalaka iti online gambling tapno nabiit a makaala ti kwarta manipud kadagiti tao ken iti oras a maigamer iti sugal ket mangparnuay daytoy ti problema kadagiti pamilya gapo iti panakailumlom ti utang ken panakadadael iti masakbayan dagiti agtutubo.
Iti laksid daytoy ket pabor ni Bise Presidente Sara nga i-regulate iti online gambling tapno saan nga amin ket maaddaan ti access kadagiti gambling sites.
Kabayatanna, iti dasig met ti Malacañang, immunan a dinakamat ni Palace Press Officer Undersecretary Claire Castro nga iti aniaman a desisyon iti panangiparit iti online gambling ket saan a rumbeng nga aramiden a madagdagos.
Iti nasao a waragawag ni Castro ket kalpasan nga inwaragawag ni Senador Raffy Tulfo iti tarigagay na a sungbatan ni Presidente Ferdinand Marcos Jr. iti nasao nga isyu iti maikapat a State of the Nation Address (SONA) inton Hulyo 28.#
